عاوزه تعملى صيانه لجهازك عشان يبقى خفيف ولطيف....تعالى معايا خطوه بخطوه

عاوزه تعملى صيانه لجهازك عشان يبقى خفيف ولطيف....تعالى معايا خطوه بخطوه
------------------------------------------------------------
انا النهارده حقولكم على شويه حاجات تعمليها كصيانه لجهازك عشان يبقى خفيف وسهل التعامل معاه

لما تلاقى الجهاز بتاعك بقى بطئ بطئ بطئ......فى النت بطئ ....فى التحميل بطئ ..... فى تسطيب البرامج بطئ....فى فحص الفيروسات بطئ...فى تشغيل الفيديو بطئ...ده حتى فى فتح الجهاز بطئ....!!!!!

طب تعملى ايه ...؟؟؟

الاول عاوزه اديكم خلفيه كده عن اسباب بطئ جهاز الكمبيوتر عموما

1- الجهاز بتاعك عاوز صيانه

2- البرامج الى بتتحمل اتوماتيك مع بدايه التشغيل

3- بطئ تصفح النت

4- زحمة الملفات والبرامج فى الذاكره

5- وجود فيروسات

تعالوا بقى واحده واحده كده نحل كل مشكله على حده مع بعض باذن الله

1- صيانه الجهاز

اوعى تكونى مفكره انى اقصد بصيانه الجهاز انك تاخديه لمركز صيانه يشوفهولك...لالالالا

انا اقصد إنك تنزلى برنامج صيانه عندك والبرنامج ده وظيفته تنظيف القرص وفحصه وازاله التجزئه فيه

والهدف فى الاخر هو التخفيف على الجهاز عشان سرعته تزيد

والمفروض الصيانه دة تحصل كل اسبوع تقريبا

طب ايه هى بقى البرامج دى...؟؟؟؟ طبعا فى برامج كتيره لتنضيف الاقراص

بس انا شخصيا بستعمل برنامج

اسمه super cleaner

وده رابط التحميل بتاعه اهو

http://www.mediafire.com/myfiles.php

البرامج دى بتنضف جهازك وتشيل اى ملفات تالفه او مش مستخدمه اول باول يعنى المفروض برده كل اسبوع كده نعمل اسكان للبرامج دى

وفى حاجه بقى كمان عاوزكم تعملوها معايا وهى اننا نعمل تنظيم للملفات وده هيكون باستخدام defragment يلا كده شوفوا الخطوات معايا

1- نروح ل my computer
2- كليك يمين على القرص سىC
3- نختار properties
4- نختار tools من القايمه ونضغط على defragment now

هتظهرك عمليه تجميع قدامك وهتلاقى تحت مربعات ملونه اضغطى على كلمه defragent سيبيه براحته خالص لحد ما العمليه تنتهى وخلى بالك ممكن تاخد وقت طويل جدا لو القرص بتاعك مليان بيانات

العمليه دى المفروض تتعمل كل 3 او 4 ايام تقريبا

العمليه دى مهمه جدا لانها بتنضف الهاردديسك فى كل الملفات المؤقته وملفات الانترنت المؤقته الى بتتقل الجهاز والى مالهاش لازمه اصلا

وكمان العمليه دى بتفحص محتويات الهاردديسك ان كان فيه اخطاء ممكن تصليحها ....ومهمه كمان لازاله التجزئه

وبتحل كمان مشكله ان مع مرور الزمن وتركيب برامج وحذفها بتفضل فراغات كبيره فى الهارد ديسك وازاله التجزئه بتحل المشكله دى وبتساعد على تنظيم الملفات وبالتالى بتسرع جهازك

شوفتى بقى قد ايه العمليه دى مهمه للجهاز

2- البرامج الى بتتحمل مع بدايه التشغيل

يعنى اول ما بتشغلى الكمبيوتر فى برامج بتقبى متحمله وبتظهر فى شريط المهام جمب الساعه تحت وبتضطرى تستنى لما كلها تحمل عشان تقدرى تتصفحى جهازك صح....

اهى البرامج دى بتقلك جهازك وانتى مش واخده بالك....طب مااحنا نشيلها احسن من مكانها ده ولما نحتاجها اهى موجوده على الجهاز تقدرى تدخلى عليها من start وبعدين programs

تعالوا بقى اقولكم تشيلوها ازاى...؟؟؟؟

طريقه سهله جدا...ادخلى start وبعدين run واكتبى كلمه MSCONFIG وبعدين ok هتفتح مربع اختارى منه فوق start up هتلاقى قدامك البرامج بتاعتك الى متحمله فى شريط المهام اعمللها disable all

وبعد كده هيطلب منك ريستارت للجهاز ولما تفتحيه هتلاقى البرامج اتمسحت من على الشريط وكله بقى تمام

3- بطئ تصفح النت

خليكى ورايا خطوه بخطوه وكلمه بكلمه وانا اقولك ازاى تخلى الانترنت تصفحه سريع وزى الفل

امشى معايا كلمه كلمه اضغطى على start وبعدين run وبعدين اكتبى كلمه Regedit

المربع الى يفتح عندك دورى على كلمه HKEY_LOCAL_MACHINE واضغطى عليها والى يفتح عندك دورى على كلمه software واضغطى عليها والى يفتح عندك دورى على كلمه microsoft و اضغطى عليها والى يفتح عندك دورى على كلمه windows واضغطى عليها والى يفتح عندك دورى على كلمه current version
واضغطى عليها والى يفتح عندك دورى على كلمه explorer و اضغطى عليها والى يفتح عندك دورى على كلمه remote computer واضغطى عليها والى يفتح عندك دورى على كلمه name space هتلاقى بقى قيمه تحتها زى دى
D6277990-4C6A-11CF-8D87-00AA0060F5BF

اتاكدى من القيمه مزبوط وشاورى عليها واضغطى كليك يمين بالماوس واختارى delet عشان تمسحيها

وشوفى بقى سرعه التصفح بتاعك

4- زحمه الملفات والبرامج على الذاكرة

ازاى بقى تخفى الزحمه دى...؟؟؟

1- اعملى كده لفه سريعه على الجهاز بتاعك فى my computer وشوفى ايه الملفات الى انتى مش عاوزاها واحذفيها وخصوصا ملفات الفيديو لانها بتاخد حيز كبير من الذاكره بتاعتك

2- احذفى البرامج الى ملهاش لازمه على الجهاز وده بانك تدخلى علىcontrol panel من start وتختارى add or remove programes هتظهرك كل البرامج الى مسطباها على الجهاز ....البرامج الى مالهاش لازمه علمى عليها واضغطى على remove وخليكى معاها لحد ماتتشال خالص

3- ادخلى على المجلد سى C من my computer وادخلى على documents and settings وبعدين ادخلى على الملف الخاص بيكى واختارى منه my document وبعدين download افتحى بقى كل الايكونات الى عندك هتلاقى البرامج الى انتى محملاها على الجهاز قبل كده او اى فيديو او اى صوره او ملف والى مش عاوزاه احذفيه والى محتاجاه اعمليله cut فى اى حته تانيه غير ال سى C

4- ادخلى على سله المحذوفات اول باول وامسحى كل الى فيها..وخلى بالك الى هتمسحيه ده مش هتقدرى تجبيه تانى

فى نقطه صغيره كمان....ساعات لما تحذفى برنامج فى control panel توفجئى ان لسه فى ملفات تخص البرنامج ده على جهازك وعشان تحلى المشكله دى ادخلى على start وبعدين run واكتبى كلمه regedit ولما يظهر المربع الخاص اضغطى على F3 واكتبى البرنامج الى لسه ملفاته عندك لحد دلوقتى وكررى F3 كمان عشان تتاكدى من الحذف الكامل وخلى بالك احذفى البرنامج الى انتى عاوزاه بس اوعى غصبن عنك تشيلى اى ملف خاص ببرنامج تانى والا البرنامج ده هيتلف منك على طول

5- وجود الفيروسات

طبعا لازم يكون عندك على الجهاز برنامج لفحص الفيروسات فى طبعا برامج كتير بس انا بحبذ برنامجين
Norton anti virus او Avira anti virus

كل اسبوع كده لازم تعملى فحص للكمبيوتر كله اول باول

وقبل بقى ما اسيبكم لانى حاسه انى صدعتكم عاوزه بس اقول حاجه كده اخيره على الماشى بالنسبه للى بيستخدموا ويندوز XP

فى طريقه كده عشان تحذفى بعض الملفات الى تساعدك على تسريع الويندوز XP

والطريقه هى.....
ندخل على start وبعدين run وبعدين نكتب كلمه prefetch وبعدين ok

وامسحى بقى كل الملفات الى موجوده قدامك دى ...والعمليه دى المفروض تحصل على الاقل كل شهر عشان تنضفى جهازك من اى ملفات مالهاش لزوم وبتتقلك الجهاز على الفاضى

بكده بقى يا قمرات بعد الصيانه الجامده دى للجهاز هتلاقى جهازك منور وفرحان بيكى وهتلقيه خفيف و لطيف ودمه مش تقيل

واوعى بقى بعد الرغى ده كله تنسونى من دعواتكم الحلوه